Hmanlai hian ni khat chu nula pakhat hi luiah tui chawi turin a kal a, lui a zu thlen chuan inbual a duh a, a thawmhnawte chu hlipin lui kamah chuan a dah a, tuiah chuan a zuang lut ta a. A inbual chhung chuan Zawng-pa a lo kal a, a thawmhnawte chu a laksak a, a kalpui ta a. Nula chuan a hmuh veleh a um a, "Zawnga, ka thawmhnawte kha min pe leh vat rawh," tiin a au tuar tuar a. Zawng chuan, "Min neih duh dawn phawt chuan ka pe leh vek ang che," a ti a. Nula chu a thin a rim khawp mai a, 'Teh chai che chuan, ka nei tawp lovang che," a ti a, Zawng chuan, "A tha a nih chu, min nei duh dawn lo a nih chuan i thawmhnawte chu ka pe hlek lovang che," a ti a. Nula chu a mangang ta hle mai a, a tawp a tawpah chuan inneih chu a remti ta a, an innei ta a; an mut dun hnu chuan Zawng chuan Nula chu an inah a hruai haw ta a. Kalkawnga an kal lai chuan Nula chuan, "Engtin nge min chawm i tum?" tiin Zawng chu a zawt ta phawng mai a. Zawng chuan,i ei atan mi lo va buhte ka ru thin ang chu," tiin a chhang a. Tichuan, Zawng hnenah chuan a awm ve ta a, Zawng chuan mi lo va buh leh vaimimte a ru thin a, chutiang chuan a nupui chu a chawm a. A nupui erawh chuan engtinnge a pasal hnen atangin a tlanbo theih ang tih ngawt a ngaihtuah thin a.
Ni khat chu a pasal awm loh hlanin a pi, a pasala nu Zawng pitar chu a that a, a vun a lip a, chu chuan a inbel a, a pi thut ang chiah chuan a thu ta a. A pasal chu a lo hawng a, a nupui chu a ma nu emaw tiin, "Ka nu khawiah nge ka nupui a awm?" tiin a zawt a. A nupui, lo inchei danglam chuan, 'Ka fapa, i nupui khawiahnge a awm ka hre hauh lo mai, a tlanbo tawh pawh a ni ang e," tiin a chhang a. Zawng chu a thin a rim ta hle mai a, "Ka nupui tlanbo na lam pawh i hre lo maw, nang pawh hi tlanbo nghal law law la, a tha zawk ang," a ti ta mai a, tiangin vawi thum a vaw leh nghal a. Chutia a han tih takah chuan a nupui chu a lawm rilru khawp mai a, "A tha a nih chu, min duh lo a nih chuan min hrilh ang chuan ka kal bo mai a ni ang chu," a ti a, a kal chhuak ta nghal a. A tirah chuan zawitein a kal a, a pasalin a hmu pha ta lo maw tih veleh chuan a chak thei ang berin a nutate in lam panin a tlan ta vak mai a. A nutate hnen a va thlen chuan a chunga thil lo thleng zawng zawng chu a hrilh vek hlawm a, a nutate chu an thin a rim khawp mai a, Zawng chu kahhlum tumin an zawng thin a, an hmu zo thin lova. Chutih lai chuan an farnu chuan Zawng fa a pai a ni tih a inhre ta a, fa a han hrin chun a pasal Zawng ang chiah mai a lo hring leh nghal a. A nunate chuan an duh lo nasa khawp mai a; thah sak an tum a, nimahsela, a phal bik si lo va.
A fapa chu a lo puitling ve ta a, a nu chuan, "Ka fapa, ramhnuaiah i pa hnenah kalin a hnenah khawsa ve tawh la, i tan a tha zawk ang," tiin a fapa chu kalbo turin a tir a. A fapa chu ramhnuai lam pan chuan a chhuak ta a, tlang pakhatah chawlin thingkungah a lawn a, ngawi rengin a thu a. Chumi ni chuan a nu, a kal san tak chuan inah la a her a, a nu la her ri chu a hria a, a lung a Ieng ta a, a nu hnen lam pan chuan a kir leh ta a, a nu pawh chuan a lo ngai hle a lo ni a. Mahse,a nutate a hlauh avangin rei deuh han awmpui chu a ngam si lova, amah ngei chuan ramhnuaiah a hruai ta a. Chumi ni chuan a nu la her ri hriat tur a awm tawh Io va, lunglen pawh hre tawh lovin a pa zawng turin a kal ve ta a ni.
){kind=link}