Mauruangi Naupan Lai
Hmanlai hian khaw pakhatah hian nupa an awm a, fanu pakhat an nei a, a hming chu Mauruangi a ni a. A nu chuan Mauruangi chu a duat thei em em thin a, ei turte hi a tui tui a ei tir thin a. Ni khat chu Mauruangi nu leh pa chu pumphir phur turin an kal ta a, thui tak an kal hnu chuan leilawn rawp tawh zet mai hi a lo awm a, chu chu zawh ngei ngei tur a ni a. A nupui chuan, "Hei kan leilawn zawh hi a rawp tawh hle mai a, hawn lam chuan rit kan phur lehnghal tawh awm si a, a va hlauhawm dawn ve maw le!" a ti a, a pasal chuan, 'Hawn lamah chuan he mi leilawn zawh ngam lo zawk zawk chu innamthlak ah," a ti a. Nakinah chuan pumphir chu an va phur a, a pasal chuan a phur tur chu a tel a, ama phur atan chuan zang takin a tel a, a nupui phur tur chu rit takin a tel sak ta a, an phurh tur ve ve chu phurin an hawng ta a. Nakinah chuan leilawn kha an va thleng a, a pasal chuan a va zawh zai zai a, a kai ta mai a, a nupui chuan a han zawh ve dawn a, a rawp em avang chuan a zawh ngam ve ta hauh lo mai a. A pasal chuan, "I dawi lutuk em mai, kal lamah a zawh ngam lo lo, innamthlakah kan tih kha," a ti a, a va kal a, a nupui chu a namthla ta daih mai a, tuiah chuan a tla ta a. Sangha lianpui Thaichhawninuah a chang a, a leng ta zur zur mai a, chumi hnu chuan a pasal chu a hawng ta a.
Tin, Mauruangi khan, "Ka nute chu an va lo haw har tawh em," a ti a, a lo thlir a lo thlir a. A pa lo haw a han hmu a, a nu chu a hmu si lova 'Ka pa,' khawiahnge ka nu?' a ti a, a pa chuan, "Luiah ka diar a su rih a tihsan mai a. Reiloteah chuan Mauruangi chuan, Ka pa khawiahnge maw ka nu le, a va lo thleng har ve?" a ti a, a pa chuan, "Luiah ka puan a su," a ti leh a. Mauruangi chuan a thlir reng mai a, mahse a nu hmel reng reng chu a hmu thei ta si lo va, a pa a han zawh leh chhuanlam a siam a, a ni lo hlir in a hrilh a, a tihder zel mai si a, khua a lo thim ta a. Zanriah ei chu a lo hun a, a pa hnenah chuan, "Ka pa khawnge maw ka nu le? a lo hawng har tawh em mai!" a ti a. A pa chuan, "Leilawn zawh thei lo zawk zawk chu tuia innamthlakah kan ti a, a zawh ve ngam ta lo va, tuiah ka namthla ta" a ti ta a. Chu veleh Mauruangi chuan pawi a ti em em a, lungchhe takin a tap a tap ta mai a.
A tuk khua a lo var chuan zing a han tho va, mei a han chhem dawn a, mei chu a lo thi vek maia, a pa chuan, 'Kawmchhakte mei han chhi tawh," a ti a. An kawmchhakte chu nufa hmeithai an ni a, a fanu hming chu Bingtaii a ni a, Mauruangi chuan, "Ka pi, in mei ka chhi ang e," a ti a, Bingtaii nu chuan, "I pa khu kan neih loh chuan kan phal lovang," a ti a, Mauruangi chu a zuk tlan thla leh a, a pa chu a zu hrilh a, a pa chuan, "Neih pawh kan la nei ang chu," a lo ti a. Mauruangi chu a han kal leh a, "Neih pawh kan la nei ang chu a ti" a han ti a, an mei chu a lo chhittir phal a, a chhi ta a.
Chumi hnu chuan Mauruangi pa chuan Bingtaii nu chu a nei ta a. An inneih tirh chuan Bingtaii nu chuan Mauruangi chu a duat hle mai a, mahse a lo rei telh telh a, a tirethei tawlh tawlh a, Bingtaii chauh chu a duat ta hlur mai a. Mauruangi chu chaw tha pawh hi a pe phal lo va, favai chiarte hi a pe thin a, Mauruangi chuan chutiang chu a ei thei si lo va, a ril hi a tam thei em em a. Riltam tak chung hian hna hahthlak tak tak hi a thawk thin a, Bingtaii lah chu awmhmunah a awm a, a nui huat huat a, a duh leh a mu a, a duh leh a thu a, a duh leh a leng a, a duh duhin a awm a.
Nakinah chuan Mauruangi chu a lo cher ta em em a,na nu kha a ngai em em thin a. Nikhat chu luiah a zuk kal a, chutia a zuk kal chu a nu Thaichhawninu a chang khan a lo hmu ta hlauh va, "E, Chemte, engnge i tih dawn teh mial le, ka han ngai em em thin che a sin le, kan nufaa kan thil tih zawng zawngte kha ka theihnghilh ngai lo a sin le, tunah hian i pa khan nupui dang a nei leh tawh nge ni, eng angin nge in khawsak tak le?" a lo ti a. Mauruangi chuan a nu a ni tih a hriat chuan a lawm ta em em a, nuhrawn a hrawn thu te leh, a nuhrawnin a tihretheihzia zawng zawngte chu a hrilh fai vek a. A ei chhiatziate chu a nuin a lo hriat chuan, sangha sa leh buhchangrumin a hrai puar ta a, "Nidangah pawh i ril a tam apiangin hetah ka hnenah hian lo kal thin ang che," a ti a.
Mauruangi chu an in lamah chuan a haw leh ta a, in a han thlen chuan a nuhrawn chuan, vin zet mai hian, "Mauruang, khawiah nge i kal, hnathawh tur a tam tehlul nen, kha i chaw hi ei thuai thuai rawh," a ti a, favai chiar chu a pe a. Nimahsela Mauruangi chuan a ei duh lova; tin, nidangahte pawh a chaw atan a ruatsak kha chu a ei duh ta hauh lo mai a, a ruk te in luia a nu, sangha hnenah khan a zuk kal a; a nu chuan chaw tui tak leh chawhmeh tui takin a lo hrai puar liah thin a, chutiang chu a ei fo avangin Mauruangi chu a lo thau ta telh telh mai a.
A nuhrawn chuan mak a ti ta hle mai a, a chaw atana a ruatsak chu han thaupui theihna niin a hre si lova. Mauruangi hian engemaw ei ruk thin a nei a ni ngei ang, favai chiar ngawt ka pek pawh hian a thau deuh deuh mai si a, enthlak ruk tur a nih hi maw le, eirukte a lo nei a nih chuan a eiruk thin chu kan tihbo sak daih tur a ni," a ti a. Bingtaii hnenah chuan, "Bingpui vawiin chu a ruktein Mauruangi hi enthla ang che, chaw eirukna a nei emaw," a ti a. Nakinah chuan tlai a lo ni a, Mauruangi chu a ril a lo tam ta em em a, a nu hnenah chuan a zuk kal leh a, a nu chuan chaw tui tak leh chawhmeh tui tak mai chuan a lo hrai puar leh ta a. Chutih lai tak mai chu Bingtaii khan a lo enthla ru reng mai a, a nu hnenah a tlan haw thuai a, "I e, ka nu, Mauruangi thauna chhan chu ka hre ta, luia a nu, ka pain a namthlak kha Thaichhawninuah a chang a, Mauruangi a zuk kal thin a, a nu chuan sangha sa leh chaw tui tak takin a lo hrai thin alawm maw le! Han cherzia a ni tawp lo mai," a ti a. A nu chuan, "Bingpuii nge nge hi i va fing thin em! Mauruangi thauna chhan i han hre hlauh a ni a. Tuna chinah chuan a cher telh telh tawh ang mawle," a ti a. Tichuan Mauruangi pa hnenah chuan, "Sangha tlang vuak tur a ni, rawt rawh," a ti a.
Sangha tlang vuak tur chuan an han au va, a khua mai chuan an lo thawk chhuak ta a. Chumi thu chu Mauruangin a lo hria a, lui lamah chuan a zuk kal a, a nu hnenah chuan, "Ka nu, nakinah a khuain sangha an rawn tlang vuak dawn a, 'Ka nu, lui mawng lamah, ka tih chuan a lu lamah kal la, "Lui hnar lamah" ka tih chuan a mawng lamah kal la, tin, lui laiah ka tih chuan a sirah kal la, "A sirah" ka tih chuan a laiah kal hlauh zel ang che," a ti a.
Nakinah chuan mi chu an lo thleng tuk tuk a, an han zim ta mai a. Mauruangi chuan a nu hnena a sawi ang khan a lo ti zel a, "A mawng lamah, a tih chuan a lu lamah a tlan zel a, 'A sirah, a tih leh a laiah a tlan a, an man thei hauh lo mai a. A tawpah chuan, 'He naupang vet avang hian kan man thei lo a nih hi, a kaah pawnchhia hnawh ula' kal bopui daih rawh u," an ti a. Tichuan an kal bopui ta a, nakinah chuan sangha chu an man ta a. A sate chu an sem a, Mauruangi te pawh chu an pe ve a, a sa chu eitir an tum a, mahse Mauruangi chuan, "Kei zawng a sa ka ei duh lo, a ruh kha min pe rawh u," a ti a. Tichuan a ruh chu an rawn pe khawm teuh mai a. Mauruangi chuan a nu ruh chu bellam chhungah a dah tha ta a. Tin, a tuk thum tukah a han en a, thi tha tak takah a lo chang vek mai a. Mauruangi chuan a thi chu a awrh ta a, tichuan Bingtaii nu chuan a itsik hle mai a, Mauruang, Bingtaii awrhtir ve rawh," a ti a, Mauruangi chuan a han awrhtir a, a awrh veleh chuan meihawlah a chang ta vek mai a.
Mauruangi chuan a nu lung kha a la bawk a, sawntlung pawngah a phum a, chu chu Phunchawngah a lo tova, atawi ta luih mai a. Mauruangi chu a nuhrawn khan a tirethei leh ta em em mai a, favai hramte a eitir leh ta a, a cher leh ta telh telh mai a. Nakinah chuan phunchawng chu a lo par vul ta chuk mai a, chumi par chuan zu a ngah hle mai a, chu chu Mauruangi chuan a dawt thin a.
"Ka nu kur diam diam
Ka nu Phunchawng Darhniangi
Ka nu kur diam diam," a ti a.
Chutia a han tih chuan a awmna lam zar apiang chu a lo kur diam diam thin a, chutiang chuan a duh tawkin a zu chu a dawt thin a, a lo thau leh ta tial tial mai a, chutia a lo thau leh tak tial tal avang chuan a nuhrawn chuan, "Mauruangi hian tlan tha te a nei leh ta ni ang, a thau leh ta telh telh mai, a ti a. Bingtaii chu a enthlak tir leh ta a, Bingtaii chuan a lo hrechhuak leh ta hlauh va, a nu hnenah chuan "Ka nu, Mauruangi thauna chhan ka hre ta. Saw laiah sawn Phanchawng tawipui a awm a, a par zu chu a fawp par thin a, a thau a lo ni," a ti a. Mauruangi pa hnenah chuan, "Saw laia Phunchawng saw kih tur a ni, kihpui tur thenawmte va sawm rawh," a ti a, Mauruangi pa chuan a hnial ngam si lova, thiante chu a va sawm a, hrepui an tat hriam a, an kal ta a. An kal chu Mauruangi chuan a hriat ve leh an hnungah a zui ru ve ta zel a, a hmun chu an va thleng a, an chek ta hlawih hlawih mai a. Mauruangi chuan a lo thlir reng a.
"Ka nu tang fan fan,
Ka nu Phunchawng Darhniangi;
Ka nu tang fan fan," a lo ti thin a.
Phunchawng chu a rek hle tawh pawhin chutia a han tih chuan a lo inawh phui leh mup thin a; an han chek leh sek sek thin a. Mahse Mauruangi chuan a nu chu tang fan fan turin a lo tir zel a. A tawpah chuan, "A, Mauruangi vangin a tlu thei lo a ni, a ka kha hnawh ula, kalbo pui daih rawh u," an ti a, an kalbo pui leh ta daih a. Phunchawng chu awl takin an kit thlu a, Mauruangi chu rethei takin a awm leh ta a.
Mauruangi Nulat Lai
Mauruangi chu rethei tak chung chuan a lo thang lian ve zel a, a lo tleirawl ve ta a. Bingtaii pawh chu a lo tleirawl ve ta bawk a. Vawi khat chu a nuhrawn chuan, "Kamin chu Mauruangi leh Bingpuii an lo nula ve ta a, mahniin thlawhhmate pawh an lo la ve thei ta a, mahniin a hrang ve vein lo nei sela, a tu thlawhhma nge tha zawk ang han nei hrang teh reng se," a ti a. Tichuan, a sawi ang chuan a hrang ve vein thlawhhma an la ta a. Lo chu an han vat a, an zo va, an hal a, kangvar a lo ni a, a nu chuan thlai chi tuh tur a pe a. Mauruangi chu vaimim chi nget te, antam chi nget te, thlai chi dang pawh a nget hlir a pe a, an pahnih chuan mahni lovah chuan an feh ta a. Nakinah chuan thlam chu an zu thleng ve ve a, Mauruangi chuan a thlaichite chu taima takin a tuh a. Bingtaii ve thung erawh kha chuan a nuin vaimim chi tha tha a thlan sakte kha a nuai thla a, thlamah a awm sur sur mai a, vaimim chi tur chu a kang a, thlam chhuatah chuan a let huar huar mai a, thlaichi tuh reng reng chu a ngaihsak peih ve hauh lo mai a. Tlai a lo ni a, an haw ta a. In an han thlen chuan Bingtaii chuan 'Ka nu, i vaimim chi min pek kha ka tuh a, Mauruangi chuan a tuh peih lova, thlamah a kang a,a ei a, a mu huar huar mai nia," a ti ta zeuh va.
A nu chuan, "Mauruang, i thatchhe lutuk em mai," a ti a, a vaw leh hrep mai thin a. Mahse Mauruangi chuan engmah a sawi duh si lova, nitin mai hian a feh fo thin a, Bingtaii lo chu a thlawh ve peih loh avangin a hnim bur mai a. Mauruangi erawh chuan taima takin a thlawh thin avangin a fai hen mai a, a lo kha chhe zawk mahsela, a taimak em avangin a vaimimte chuan ei a lo tling ta a.
Vawikhat chu Vai lalpan nupui tur a duh a, a chhiahhlawhte chu a nupui tur zawng turin a zin chhuah tir hlawm a. Nikhat chu Mauruangi lo chu kalkawng lai a nih avangin lal chhiahhlawhte chuan an va thleng a, Mauruangi chu a lo feh a, amah chauh vin a lo thlo karh karh a, chhiahhlawhte chu an ril a tam hle hlawm a. Mauruangi lovah chuan vaimim te, fanghma te, a tam mai a; chhiahhlawhte chuan, Khawngaih takin i lova fanghmate hi kan ei ang e, kan ril a tam tawh em mai," an ti a. Mauruangi chuen, 'Ei e a, a tuai tha kha in duh tawkin ei rawh u, khawi lama kal tur nge in nih le?" a ti a. Chhiahhlawhte chuan an chunga a that em avang chuan an pu nupui atan an duh ta hle mai a. "Kan lal chu Vai lal tak a nia, a nupui zawn sak turin kan zin a ni, nang hi kan pi atan kan duh zawng tak i ni a, kan pu nupuiah i awm duh lawm ni? Kan pu nupui i nih duh chuan i duh duh i eiin i in thei anga, i duh duh i sinin i feng thei bawk ang a; tin, i duh leh i mu ang a, hna pawh i thawk lovang," an ti a. Mauruangi chuan, "Kei tehlul min duh chuan engahnge keiin ka han duh loh vang, ka nu leh ka pa thu thu a ni ang chu," a ti a. Chhiahhlawhte chuan, "A nih loh leh i nu leh i pa te chuan an phal lovin i ring em ni?" an ti a. Mauruangi chuan, "E, phal lovang, ka nu chu nuhrawn a ni a, a han remtih loh zia mai tur chu, a ma fa bik, Bingtaii a awm a, chumi chu neih duh zawngin dil ula; tin, in hruai hnuah kan dai thlengin ka thlah ang a, keimah min hruai hlauh dawn nia," a ti a. Chhiahhlawhte chuan, "Aw le, chutiang chuan kan tum nge," anti a. Tlai chu a lo ni a, feh chu an hawng ta hlawm a, Mauruangi pawh chu mikhual te nen chuan an haw ta a, chumi nia a mikhual hmuhte chanchin chu engmah a sawi duh lo va.
Zanriah ei khamah chuan chhiahhlawhhote kha an lo leng ta a. Bingtaii nu chuan, "Khawi lam khual nge in nih le? Engnge in duh? a lo ti a. Chhiahhlawhte chuan, "A, eng dang duh lo ve, hei in fanu Bingi hi kan lalin nupui min zawn tir a, rem in tih chuan min neihtir rawh u," an ti a. A nu chu a lawm ta em em a, "E, nei tuk e a, in duh phawt chuan nei rawh u. Bingpuii hi zawng Mauruangi a ang ve lova, tha tak a nia, a taima si a, han nei mah ula, in inchhir tawp lovang,"a ti a. Tichuan Bingtaii chu an zawn ta a, a nu chuan, "Mauruang, i nau Bingtaii pasal nei tur hi vawk chaw dawl zawn pahin va thlah rawh, nang pasal pawh hmu zo ve hlei lo che," a ti a. Mauruangi chuan em a phur a, a zui ve ta a. Vai lal chhiahhlawhte chuan Bingtaii chu taiten zingah an namthla a, Mauruangi kha an zawn haw ta daih mai a. Bingtaii kha zak takin an in lamah a hawng leh ta a. Bingtaii nu khan a lo hmu a, a thinur hle mai a. Mahsela Mauruangi lah chu tunhma ang khan a duh duhin a sawisa thei ta hauh si lova, a thinrim chu a insehruh ta teuh mai a.
Mauruangi Pasal Neih
Mauruangi kha vai lal chhiahhlawhte khan an zawn hawng a, an pu hnen chu an zu thlen ta a, an pu chuan a lo hmuh veleh a lo lawm em em a. Mauruangi chu silhfen tha tha a bel a, engkim ei tur lamte chu a duh duh eia barin a awm ta a. Tin, a nuhrawn khan Mauruangi a tihhlum theihna tur a ngaihtuah ta hle mal a.
Vawikhat chu an khuaa lo zin turin Mauruangi chu a chah ta a. "Mauruangi kha lo zin rawh se, vawk ka talh ang e," a ti a. Mauruangi chu a va zin ta a, chutia a va zin lai chuan a nu chuan, Hawh, Mauruang, kan leikapuiah ka hrik mi en ang che, ka hrik pawh i en khat tak em hi," a ti a. Mauruangi chuan, "Aw le," a ti'a. A hrik chu a ensak a, a nuhrawn chuan, 'Mauruang, in hnuaia khu ka sakuh ka thlauh ta hlauh mai, min zuk chhar teh," a ti a.
Mauruangi chu a zuk kal a, "Ka nu, khawi laiah nge maw a tlak le?" a ti a. A nu chuan a tla hauh lo hi a tih der a ni si a. "Kha laia kha maw le," a ti leh mai thin a, Mauruangi chuan a zawng a zawng a, a hmu si lova, chutia a sakuh zawng kun lai chu a nu chuan tui chhuanso a va leih a, Mauruangi chu a thi ta a. Tin, chumi a ruang chu Saza te hian a lo chhar a, a tinung a, a nau awmtu a tan a nei ta a. Tichuan a pu Sazaa nau chu nitin a awm thin a. Tin, Mauruangi zin chu a rei tak em avangin Vai lalpa chuan a chhiahhlawhte a tir leh a, 'In pi zin a lo haw har ta em mai, han lam rawh u," a ti a. Chhiahhlawhte chu an kal ta a. Nakinah chuan Bingtaii te in chu an han thleng leh a, a nu hnenah chuan, "Ka pi, khawiahnge kan pi Mauruangi?" an ti a. Ani chuan "A, sawlai a saw," a ti a. Bingtaii chu a kawhhmuh ta a. Chhiahhlawhte chuan, "Hei chu kan pi a va ang ta lo ve?" an ti a.'Ani chuan, "A nih kha, in va a tak em, mahni pite han hai chu, kha kha anih kha, zawn haw leh ta ula anih chu," a ti a. Chhiahhlawhte chuan awi manglo tak chung chuan an zawn ta a.
Tin, Mauruangi ke zungpui kha sava teah a chang a, Bingtaii an zawnna kiangah chuan a lo thlawk a.
"Zawn suh, u, zawn suh u,
Mauruangi chuni lo;
Bingiaituki a ni e,
Mawng sawh dawm dawm," a rawn ti thin a.
Chhiahhlawhte chuan an han sawh leh dawm thin a. Bingtaii chuan chu sava te chu a haw khawp mai a, a hau hmuar hmuar thin a. Tin, an han zawn leh a, sava te chu a hram ngai chuan a hram a hram leh reuh thin a. Nakinah chuan in an zuk thleng ta a, an lal chuan, "Kha in pi kha a va ang ta lo ve, a hnarte chu a va tawk ta hler hlur ve? In pi tak tak a ni nge ni lo hre turin puan kan thlantir tur a ni," a tia. Chhiahhlawhte chuan, "Kan pi, i puan tah rawh khai," an ti a. Bingtaii chuan Mauruangi puanbu dahna kha hre hek lo, "Khawiahnge maw ka puanbu dahna kha le?" a ti a. Chhiahhlawhte chuan, "Ka pi hi chu eng i ti ta nge ni, mahni puanbu dahna pawh i hriat tak thin loh le? Khumsirah i dah a nih kha," an ti a. Bingtaii chuan, "A nih awm tak kha maw le," a ti a, a va la ta a. Themtuihnawih chu a hmu leh ta lova, "Khawiahnge maw ka themtuihnawih kha le?" a ti leh a. Chhiahhlawhte chuan engkim awmna chu an hrilh zel a. A puan chu a han vawng a, a han thlang dawn a, mahse a thlang thiam ta thuai lo mai a. Chumi lai chuan Mauruangi kezungpui savatea chang kha a lo thlawk leh a, Bingtaii puan tahna bul lawkah chuan a lo thlawk a.
"Hnuaitiang kha, hnuaitiang kha,
Chungtiangah chhiah la:
Chungtiang kha, chungtiang kha,
Hnuaitiangah chhiah la;
Ka ti ir iak e" a han ti a.
Bingtaii chuan, "Chu savate chu a va bengchheng teivet em," a ti a, a themtleng chuan a hawl leh zoh thin a, a tawpah chuan a thlang thiam ta ngang lova, a dah ta mai a.
Ni khat chu Vai lalpa chhiabhlawhte chu an va ram chhuak a, chutih lai chuan puk pakhatah hian Mauruangi chuan a pu Sazaa nau a lo awi a.
"Hmanlai chuan, hmanlai chuan,
Vai lal nupui ah ka awm;
Tunlai chuan, tunlai chuan,
Ka pu Sazaa nau ka awi;
Ai i e, u aw e," a lo ti diai diai a.
Chhiahhlawhte chuan an ban hriat chuan, an pi Mauruangi aw niin an hria a; an va en a an en chuan a lo ni ngei a. Engtizia a chutianga awm nge a nih te an zawt a. Mauruangi chuan a hrilh ta vek a. Chhiahhlawhte chuan, "Ka pi tunah hian kan hruai hawng leh ang che, kan pu nupuiah i awm leh dawn nia," an ti a. Ani chuan, "E, keima thu thuin ka awm lova, he ka pu Sazaa nau ka awm a, nakinah ka pu Sazaa a lo hawng anga, lo dil ang che u," a ti a. Chhiahhlawhte chuan, "Aw le, kan lo nghak ang" an ti a, an lo nghak ta a.
Tlai chu a lo ni a, Sazaa feh chu a lo haw ta a. Mahse mihringte chu a hmuhin a hlau va, a lut ngam ta lova. Chhiahhlawhte chuan an lo kova, "Lo lut teh khai, hei i hnenah hian thu khawchang sawi kan duh a, kan lo nghak reng che a nih hi," an lo ti a. Sazaa chu a va lut ta a. "Eng thu nge ni, sawi tur in neih le?" a ti a. 'Hei i nau awmtu hi kan pi a ni a, kan lal nupui a ni a, khawngaih takin min pe leh la, tangka tam tak kan pe dawn che nia," an ti a, Sazaa chuan, "E in pi anih chuan la leh ta che u, a man atan chuan tangka a ngai lo vang a, balhla thlar khat min pe ula a tawk mai e" a ti a. Chhiahhlawhte chuan, balhla thlar khat chu an pe ta a. Sazaa chuan lawm takin a la a, Chhiahhlawhte chuan an pi chu an hawnpui ta a.
Vai lalpa chuan Mauruangi chu a lo hmuhin a Iawm em em mai a, a nupuiah a awm leh ta a. Tichuan Vai lal chuan a nupuite pahnih Mauruangi leh Bingtaii chu "insual rawh se, tichuan a hnehtu zawk zawk chu nupui atan ka nei ang," a ti a. Tichuan Mauruangi chu puanpui tharin a tuam a, Bingtaii erawh chu vai puan pan takin a tuam a, khawmhma chem chhe tak hi a kentir a, Mauruangi chuan, "Nang mi sat hmasa rawh," a ti a. Bingtaii chuan a han sat ri khurh a; mahse Maruaugi chu a satna zo lova. "Khai le, keiin ka han sat ve thung ang che", a ti a. Kawlhnam hriam tak chuan a fik ta hmawk mai a. Mauruangi chu tibuaitu awm lovin Vai lal nen chuan hlim takin an innei leh ta a.
){kind=link}