Mizoram khaw chhak lamah khian Vaphai khua a awm a. Chu khuaa Pu Khuahsanga fapa Lalbiakvela chu kum 1980 vel aṭang khan Pathian Thlarau Thianghlim pawlna changin Pathian faka zai ho leh ṭawng hriat loha zai hi nuam a tiin zan rei tak tak thleng lengkhawmin zan an tumtawi ṭhin a ni.
Kum 1987 fur lai khan zan khat chu inkhawm banah Lalbiakvela rilruah Vangchhe khuaa kal a lang ta tlat mai a. A pa hnenah, “Ka pa, Vangchhiaah kal a ṭul tlat mai a, ka kal nghal dawn e,” a ti a. A pa chuan, “Zanah lehnghal ruah a tla seng seng reng bawk si a, eng nge i han tih ang le?” a ti a. Biakvela chuan chhang ta lem lo chuan ngawi rengin a insiam mawlh mawlh a, nihliap pawh keng lovin a thawmhnaw hak lai nen chuan a kal chu a ni ta mai a.
Vaphai leh Vangchhe inkar hi chhuk chho hlir, km 10 vela hla a ni a. Vangchhia a han thlen chuan an lo mu reh tawh a. Khawlaiah hmun thum velah Pathian thu a tlangaupui a. Ruah a tlak deuh reng bawk avangin a u te ina riak tura kal a tum a. Mahse a u te in pan ta lo chuan an khaw lam panin a kal ta zawk a.
Fur lai mah ni se, kalkawng lang theiin thla a eng deuh ruai a. Khua a pel fel deuh chauh tihin kawnglaiah chuan keipui hi a lo ding vûng mai a. Keipui a han hmu chu hlauhna rilru pawh pu ta lo chuan a ding chawt a, a en ve ta nghawt mai a ni. Keipui chuan a mei chu a ti che ngulh ngulh a. Vaphai kawng lam hawiin a her a, a mawng lam chu Biakvela lam a rawn chhawn a. Ani pawh chuan, “E! Lalpa’n min hruaitu atan a rawn tir a ni ngei ang,” tiin a pan a, keipui mei chu a vuan a, a zui ta zel a. Vaphai dai, ‘Vangchhe kawtchhuah’ an tih an thleng a. Keipui chu kawng sirah a peng ta a. A pensan dawn chuan Biakvela chuan keipui hnungzawng hmul a pawt thla a. Chu chu humin an in a thleng chu a pa chuan zing mei a lo chhem dawn mek a. In chhunga a han lut chu a pa chuan, “Tun zing zingah khawnge i kal a?” a lo ti a. Ani chuan, “Vangchhiaah ka kal alawm maw le,” a ti a. A pa chuan, “E khai! Zan zana ruah sur hnuaiah lehnghal, thu awih-awm va ni suh,” a ti a. Biakvela chuan, “Ka pa, engah nge i awih loh. Hei en teh, sakei hnungzang hmul ka pawh thlak pawh ka la hum asin,” tiin a entir chu a pa chuan a han en vung vung a, “E! Sakei hmul chu a nih tak hi maw le, a va ropui êm!” a ti a, a ngawi ta reng a.
Pu Lalbiakvela thil thawn hian “Thil siamte pawh Pathian tirhkoh an lo ni vek, zah tur a ni,” tih hla dikzia a tar lang chiang hle a ni.
Fanai Lalṭansanga
