Chhurbura Thih Dan
Chhura hi Vanlaiphai vel hi a chenna ber a ni a. Vawi khat chu a zin ta a, hmar lam panin a kal a Thinglianah te, Ngentang ramah te, Rullamah, Khawbelah, chuta tangin Maite ah, Tawizoah, Ruallungah te a kal zel a, Saitual atangin Khandaihah, chuta tangin Khawlian tlangah a kai phei a, Parvachawmah te a kal zel a, Tlanchhipah te nen, tichuan a tawp a tawpah chuan Meihlangphai a va thleng ta a. Chu khua chu khaw lian tak leh nuam tak mai a ni a. Chhura a va thlen lai tak chuan Nghengtawlh an lo tlawh mup mup mai a, thlen in tur pawh zawng hmasa lem lo chuan Chhura chu a tel ve ta mai a. Nuam a tih zawng tak mai a ni a, thlen in zawn nachang pawh hre lo chuan a tel zel a. Mite chu chaw te an ei a, an chaw ei khamte chu an lo tel leh zel a ni a. Tichuan, Chhura chu chaw pawh ei si lo, nilenga lo kal, tel ve ta nghal mai kha a ni a, a lo tamchhawl ta a. Tuma'n an ngaihsak lo va, an ngheng lang an ngheng lang a, a thi tih pawh an hre lem lo va. Nakinah an han tin darh hnu chuan Chhura chu a lo thi reng mai a ni an ti. A thih dan hi a hreawm lem lo vaui a ni, nuam tawla thi tih theh a ni.
A thih thu hi sawi dan danglam hret a awm a, hetiangin Lal pakhat Vaipachawnmanga thi man tam a bo va, a rutu an hre thei lo va, a hria chu lala siam ve a tiam a. Chu chu Chhura chuan hriat a tum a, a ngaihtuah lai tak chuan a pum a lo ri ta rawk rawk a, a pum ri chuan, "Kirh kirh, karh karh,' ti hian a hria a. Tichuan, 'Vaipachawnmanga thi chu Kurh leh Karha ruk a ni," a ti ta mai a. An han zawt vel a Kirha leh Karha ruk chu a lo ni tak tak a, an chhuh leh ta a. Chhura chu lalah an siam ta a ni. Chutia a lal ta chu, "I duhthusam ber engnge ni" an ti a, ani chuan, 'Nghengtawlh tawlh hi nuam ka tih zawng ber a ni," a ti a, tichuan, a khuate nen chuan nghengtawlh chu an tlawh ta chiam mai, Chaw ei tura tin lawk ve nachang pawh a hre lo va, a tawp a tawpah an nghen hlum tak a mi an ti.
