Hmanlai hian Zawngte hi a awm a. A hlimna ber chu pipu uai a ni a, chawnghei thak thak khawpin a uai thin a, nikhat chu a pipuah a uai leh a. Nuam a ti em em mai a, a mitte a chhing diar diar a, sang tak takah a inthen chho thin a. Chutih lai chuan Savawm a lo kal a, Zawngtein a pipu a uai chu nuam a tihzia leh a hlimzia a hmuh chuan uai ve a chak ta a. Zawngte hnenah chuan, "Zawngte, khawngaih takin i pipuah khan ka lo uai ve ange," a ti a. Zawngte chuan hawihhawm takin, 'Ka pipu hian nangni ang mi lian chu a dawl lovang tih ka hlau mange, i uai hmain a suihnate khi a nghet tawk em tih ka han en chiang hmasa phawt ange," tiin a chhang a. Tichuan Zawngte chu thingler ah chuan a han lawn a, a ruk tein pipu chu a han rek a, Savawm uai veleha chat turin a dah ta a. A lo chhuk leh chuan Savawm hnenah chuan tawngkam tha takin, "Khai le, tunah chuan i uai thei tawh ang," a ti a. Savawm chu uai tur chuan a han lawn ta a. Chutihlai chuan Zawngte chuan a arte chu an keu hmain a lo chhiar dim diam a. Ama ei atan chaw tui tak a buat saih ta a. "Savawm chu a han inthen sang anga, a hrui a chat anga, a tla thum tawk anga, a thi ngei awm si a. Savawmte chu an sa a tamin a tui si a, chaw tui tak min siamsak thuai dawn a nih hi," tiin hlim takin amah leh amah chu a inhrilh mawlh mawlh mai a.
Savawm chu pipuah chuan a han uai ta a, a han inthen sang a, pipu chu a chat a, a tla thum ta tawk mai a. A tla thum dawt ri chu Zawngte chuan a lo hria a. Rang takin a pipu lamah chuan a tlan vat a. Savawm sa ei thuai thuai mawlh mai chu a nghakhlel a, a ngaihtuah ber a ni a. A hmun a va thlen chuan Savawm chu thia hmuh a tum naklaiin, a thinrim leh hlauhawm em em hmel chu a va hmu ta phut mai a.
Zawngte chuan inthup hram hram a tum a. Inthlahrung leh pawi tih hmel takin, "Ka pipu atanga i tla ri dawt ka lo hria a, rawn tanpui tur chein ka lo tlan a ni; chaw pawh ka rawn ken che a sin," a ti a. Savawm chuan Zawngte rilru chhiatzia leh dik lo taka bum a nih dan chu a lo hre vek mai si a. Thinrim em emin seh tumin a zuan ta thut mai a, a zuan thelh hlauh mai a. Zawngte chu thingah a lawn ta daih a. Savawm chuan Zawngtein ama ei tura chaw a lo buatsaih diam chu a ei zawhsak ta vek a. Zawngte chuan thingler atangin a thlir reng ringawt mai a, engmah a ti thei tawh si lova. A pipu pawh chu a uai thei tawh bawk si lova, a sual man a hmu a ni.
